|
滙豐銀行前副總經理「劉Sir」劉智傑退休後嗜好多多，幾舊水買馬贏一百七十萬元嘅事通晒天，早排同佢吹水講開，佢就話：「唓，好多年前嘅事啦。」其實佢最厲害唔止贏錢咁簡單，而係佢有一本「賽馬易筋經」。 劉Sir由紅褲子出身升做滙豐首位華人副總經理，絕對唔係靠運氣，係靠多年努力。呢樣嘢同佢買馬真係同出一轍。之不過，劉Sir係從失敗中學習，將多年買馬經驗，親筆抄低成為一本「賽馬易筋經」，絕對唔差得過少林寺嗰本。 講起呢本經，佢笑到咔咔聲話：「我自己寫去提醒自己之嘛，其實係一本筆記，去提醒咗我賭馬唔好再犯同一個mistake，其實賭馬又好，炒股又好，你唔記得你一衝動又會再錯，所以久唔久要睇番吓 ，唔好重犯，你犯錯少咗已經輸少咗啦。」 但令人更O嘴嘅係，佢仲搵人研發咗三個賽馬用嘅軟件，增加贏馬嘅概率，但佢話軟件係自己用，送畀人都唔識用。劉Sir有易筋經，又有軟件，簡直係現代嘅武俠。 | 
發表於 2014-4-15 10:52:37
收藏