【1396】毅德國際與主席失去聯絡！

CarmenNg

主席無影毅德照Run  

人間蒸發古仔，間唔中會喺新聞出現，上市唔夠一年嘅毅德國際（01396）亦有疑似個案，毅德國際尋日就發公告，指足足有兩個星期唔能夠同主席兼執董王再興取得聯繫，連公司行政總裁、王再興個仔王德文都唔知老竇去咗邊，又一齣尋親記。

阿仔王德文擔起大旗
毅德事件令絲絲憶起，經歷唔少是是非非嘅雅天妮（00789）前主席謝超群，都試過同前妻葉英琴失去聯絡。創辦雅天妮嘅呢對夫妻早兩年突然爆出連串負面消息，最初話謝超群因健康問題需休息，到雅天妮宣布有十日未能與謝超群接觸，要委任葉英琴接手管理職權，至今兩人終告全身而退，由謝氏胞弟謝海州接任主席兼行政總裁。

今次輪到商貿物流股毅德主席暫時失蹤，相信上任行政總裁兩個月嘅王德文都幾唔得閒，雖然毅德目前運作正常，日常業務營運同管理主要交由阿仔王德文領導，但王德文都要聯同班高級管理團隊主持大局，依家仲諗緊過渡措施。睇嚟毅德基礎投資者之一聯想控股旗下弘毅投資，身為第二大股東，都係時候幫手尋人喇。

文: 余絲韻